In data 25 Aprile 2026 il Santo Padre ha nominato l’Ecc.mo Mons. Paul Richard Gallagher, Segretario per i Rapporti con gli Stati e le Organizzazioni Internazionali, Suo Inviato Speciale al centenario dell’erezione canonica della Provincia Ecclesiastica Lituana, prevista per il 27 giugno 2026 presso la Cattedrale dell’Arcidiocesi di Kaunas.
Pubblichiamo di seguito la Lettera del Santo Padre all’Inviato Speciale, l’Ecc.mo Mons. Paul Richard Gallagher:
Lettera del Santo Padre
Venerabili Fratri
PAULO RICHARDO GALLAGHER
Archiepiscopo titulo Hodelmensi
Secretario Sectionis Secretariae Status
de Rationibus cum Civitatibus et Institutis Internationalibus
Sollicitudo Ecclesiae pro populis non modo ad catholici nominis incrementum, sed etiam ad ipsam rei civilis prosperitatem confertur, ut per bona, quae cunctis Evangelium affluenter largitur, de Christi inexhausto fonte amoris cordibus ardore perfusis, omnes virtutes, quavis divisione sublata, in hominum societate firmentur ad opus iustitiae, inspirante caritate, perficiendum (cfr Miss. Rom., Pro variis necessitatibus, 29).
Haec considerantes, valde laetamur de centesimo celebrando anniversario a creatione Provinciae ecclesiasticae Kaunensis in Lituania, quae de eadem archiepiscopali Sede una cum suffraganeis dioecesibus Telsensi, Panevezensi, Vilkaviskensi, Kaisiadorensi et Praelatura Klaipedensi tunc constabat, die IV mensis Aprilis anno MCMXXVI constitutae, quo Resurrectionis Domini Nostri Iesu Christi tunc temporis celebrabatur sollemnitas, ut iure ergo meritoque, quae in difficilibus adiunctis est constituta et asperrima transiit, indefessi pastorum laboris gratia saeculum expleret, virtutem sibi comparans prudentiae primae suae annorum pulchrae vetustatis.
Tantam proinde recolentes memoriam, ut inter sollemnia perfrui possent christifideles praesentia ac verbo alicuius Praesulis in ecclesiastica dignitate constituti, qui Nostras vices ibi gerat Nostramque erga istam communitatem manifestet dilectionem, Venerabilis Fratris Gintaras Grušas, Archiepiscopi Vilnensis et Conferentiae Episcoporum Lituaniae Praesidis, humanissimae petitioni concedentes, ad Te, Venerabilis Frater, mentem Nostram vertimus, qui adiuncta Ecclesiae in illis Europae regionibus atque humani divinique cultus et pastoralis operis inde propagati admodum comperis, ut hodie peraptus videaris ad Ecclesiae sollicitudinem per hoc ministerium tuum significandam. Idcirco, hisce Litteris Te Missum Extraordinarium Nostrum nominamus ad sollemnia, quae die XXVII mensis Iunii huius anni in cathedrali Kaunensi agentur ad centum honorandos transactos annos ab eiusdem ecclesiasticae Provinciae constitutione.
Libenter tibi potestatem facimus, dum celebrationi Eucharistiae praesidebis, clerum et populum, necnon publicas auctoritates atque universos christifideles Nostro nomine salutandi ac benedicendi, quos cohortaberis, ut his tempestatis temporibus iustitiam diligant, concilient pacem ac tueantur caritatem, quae praecipuum vitae christianae firmamentum continent, sine quibus aut nullae omnino sunt aut fructu vacuae virtutes, in virtutum christianarum palaestram praesidium disponentes salutis civitatis (cfr Leo PP. XIII, Litt. enc. Sapientiae christianae).
Dum gravissimum Nostrum ministerium precibus committimus communitatum istius ecclesiasticae Provinciae illic congregatarum, tibi, Venerabilis Frater, Benedictionem Nostram Apostolicam impertimur omnibus, qui celebrationi intererunt, trasmittendam, legationem tuam ardentibus precibus co-mitamur, a Deo misericordiae suppliciter exposcentes, ut coetus hic fidelium, hunc laetitiae diem affectu sedulo celebrans, quod recordatione percurrit semper teneat in opere.
Ex Aedibus Vaticanis, die XXVIII mensis Maii, anno Domini MMXXVI, Pontificatus Nostri secundo.
LEO PP. XIV
© Bollettino Santa Sede - 24 giugno 2026
